CEBU, Philippines - Sinakong mga pirated DVD’S ug software ang gisakmit sa mga sakop sa Optical Media Board sa gipahigayong kinalit nga raid sa mga tindahan sulod sa APM Mall sa North Reclamation Area ug sa E-Mall sa downtown sa syudad sa pakig-alayon sa Crime Investigation and Detection Group (CIDG7) kagahapong adlawa.
Ang mga stalls nga nasakmita’g pirated DVDs mao ang tulo ka stalls nga Hafizah, Tinker, ug Winky Stores sa APM Mall ug laing siyam ka mga stalls sa E-Mall.
Matud sa team leader sa Optical Media Board, Atty. Cyrus Valenzuela nga gipahigayon kining maong pagpangronda gumikan sa usa ka complaint gikan sa usa ka Sugbuanon.
Dugang pa ni Valenzuela nagtinabangay ang OMB ug ang CIDG- 7 aron dali nilang masikop ang mga nagbaligya gihapon og mga pirated DVD’S, ug software.
Tulo ka pampublikong pasaheroan ang giabangan sa OMB aron dad-on ang mga nasakmit nga DVDs ngadto sa CIDG Office ug human ila kining ipadala sa ilang bodega aron panggubaon.
Ang OMB miingon nga magpadayon ang ilang operasyon dinhi sa Kabisay-an human sa ilang malampuson nga operasyon kagahapon. (BANAT NEWS)