Mandaue motuon sa paagi sa Germany paghipos sa basura

CEBU, Philippines - Gitun-an karon sa kagamhanan sa dakbayan   ang tukmang paagi sa paghipos sa basura pinaagi sa pagsagop sa pamaagi sa Germany.

Aron matuman ang maong tinguha, mituyo gyud pagbiyahe si Mayor Jonas Cortes ngadto sa Germany niadtong Oktubre 10 ug gitakda siyang mouli sa Oktubre 20 pa niining tuiga.

Ang tigpamaba ni Mayor Cortes nga si Roger Paller nga nahinabi sa Banat News miingon nga naglakip sa tuyo sa mayor sa iyang biyahe ngadto sa Germany mao ang pagtan-aw sa mga kahimanan sa paghipos sa basura sa   maong  nasud nga mao usab ang gitinguhang gamiton sa dakbayan sa Mandaue.

Si manlalaban Benjamin Cabrido nga maoy consultant on environment sa kagamhanan sa maong dakbayan nagkanayon nga sama sa kampanya sa tukmang paghipos sa basura dinhi maila usab sa mga molupyo ang paggama og abuno gikan sa mga basura.

Gitinguha usab sa kagamhanan sa dakbayan nga ang mga dagkong establisamento, mga tulunghaan ug mga merkado publiko kinahanglang mopatuman usab sa ilang gitinguhang backyard gardening.

Gipasabot niya nga ang mahimong abuno gikan sa gibahig nga madunot nga basura sama sa mga utanon, biya nga mga pagkaon ug uban pa    magamit sa pag-abuno sa mga tanom sa backyard gardening nga ipatuman sa kagamhanan sa dakbayan.

Dugang pa niya nga kun maghinubra na ang maong mga abuno gikan sa madunot nga mga basura adunay dakong kahigayonan nga ibaligya na usab kini ngadto sa uban nga nanginahanglan niini. (BANATNEWS)