CEBU, Philippines - Nabuak ang ulo sa usa ka 19- anyos nga dalaga human mabangga sa poste ang gisakyan nilang motorsiklo ug kritikal usab ang kahimtang sa ig-agaw niining nagmaneho diha sa national highway sa barangay Tapon sa lungsod sa Dumanjug niadtong Biyernes sa alas 11:15 sa buntag. Patay diha-diha mao si Carl Pine Joy Nemil, 19, nagpuyo sa maong lugar samtang ang drayber nga iyang ig-agaw nga si Kirk Nemil grabe usab ang kahimtang.
Matud ni SPO1 Joselito Abella sa Dumanjug Police Station dihang nahinabi sa Banat News, ang duha gikan sa lungsod ug kusog nga nagpadagan paingon na untang mamauli sa barangay Tapon ug pulos wala magsul-ob og helmet. Pag-abot sa maong lugar nga kurbadahon ang dalan nawad-an og kontrol sa manobela ang drayber ug mibangga sila sa poste sa kuryente ug nangalabay.
Ang babayeng biktima nag-una ang ulo nga mitugpa sa sementadong karsada ug namatay diha diha samtang ang drayber nga si Kirk gitabang ug gihatud sa Barili District Hospital. Tungod sa kagrabe sa iyang kahimtang gibalhin kini lahos sa tambalanan dinhi sa dakbayan sa Sugbo.
Nasuta sa imbestigasyon sa kapulisan nga bag-ohay pang nakamao sa pagmaneho og motorsiklo ang drayber ug naratol samtang kusog ang pagpadagan hinungdan nga nawad-an og kontrol sa manobela ug nalahos sa poste. (BANATNEWS)