Agtang napisok sa bala sa shotgun

CEBU, Philippines - Naagtang sa bala ang lineman sa CEBECO gikan sa shotgun   sa security guard   sa    usa ka bangko nga napantok sa lamesa sa gawas sa opisina niini sa dalan J.P. Rizal St., Poblacion-1 dakbayan sa Carcar niadtong Biyernes sa alas 2:00 sa hapon.

Ang biktima mao si Eusebio Matora Jr., 51, minyo, nga taga barangay Canbanua lungsod sa Argao ug lineman sa Cebu Electric Cooperative (CEBECO). Samtang ang suspek nga gwardiya sa bangko mao si Oldarico Lobrino 1V, 29, ulitawo, nga taga Poblacion lungsod sa Alegria   kinsa maoy guwardiya sa Palawan Bank.

Si PO2 Rosendo Benondo sa Carcar City Police Station mibutyag sa  Banat News  nga didto sa gawas sa opisina ang suspek nga nagsambilay sa iyang shotgun dihang aksidente kining napantok sa  lamesa ug mibuto.

Unya ang bala nga mitugpa sa semento sa ubos mibanda ug sa pagtuasik niini didto moigo sa agtang sa biktima kinsa naglingkod sulod sa usa ka pasaheroang multicab nga nag-parking atubangan sa bangko. 

Daling gihatud sa Carcar District Hospital ang biktima samtang ang suspek gidakop ug gibalhug dayun sa karsel sa kapolisan samtang gihikay   na ang tukmang kaso nga isang-at batok kaniya.(WC)  (BANATNEWS)