Kalabira sa bayot naugkat

CEBU, Philippines - Kalabira nalang ang ulo ug dugta na ang lawas dihang nakawtan sa mga polis sa abandonadong building sa dalan San Roque, barangay Lipata sa lungsod sa Minglanilla ang usa ka mahuyang nga na-missing sukad pa niadtong milabay’ng bulan sa Mayo.

Ang kalabira nga nakuykuyan niadtong Biyernes sa hapon iya ni Albert Navarro, 54-anyos, taga barangay Lawaan I, dakbayan sa Talisay. Usa ka Richard Sanchez Mandal, 34 taga dalan Fidel Bas, barangay Lower Mohon, dakbayan sa Talisay ug drayber sa traysikol ang gisuspetsahang responsable sa krimen.

Si SPO4 Daniel Tarucan nga nahinabi sa Banat News mibutyag nga niadtong Mayo 23, 2011, ang pag-umangkon sa biktima nga si Phoenix Navarro Zabala mi-report sa ilang buhatan kabahin sa wala na pag-uli sa iyang uyoan.

Matud ni Tarucan nga si Zabala misulti ngadto kanila nga ang biktima milakaw niadtong Mayo 16, 2011 sa hapon paingon nga mobayad sa bill nila sa telepono.

Sa imbestigasyon sa kapolisan ang ulahing nakauban sa biktima ang suspetsado kinsa kadudahan ang paglikay-likay niini sa mga kabanay sa biktima hangtud nga namalhin gyud kini og puyo.

Ang igsuon sa biktima nga si Galen Navarro, miadto sa gipuy-an sa suspetsado ug nagsukit-sukit apan nabantayan ni Galen nga sa iyang pagsige og pagpangita sa igsuon diha sa suspek naglikay-likay na kini.

Ang mga polis nakadawat og report nga ang suspetsado nagkawot diha sa ilawom sa hagdan sa building nga kaniadto gipuy-an niini.

Tungod kay walay klarong eksplinasyon sa pagkawagtang sa igsuon ug ang kalit nga paglikaylikay sa suspek nga giingong karelasyon sa ilang igsuon nagpauban niadtong Biyernes si Galen nila ni SPO4 Tarucan, PO3 Ferdinand Pablo, PO3 Benedicto Lasque ug PO2 Stephen Sefuesca ngadto sa building.

Sila si Lasque ug Sefuesca maoy mikawot sa dapit diin giingong gikawot kaniadto sa suspek ug diha nila madiskubrehi ang usa ka kalabira nga positibo dayong giila ni Galen nga iya ni Albert tungod sa gisuot niining beads nga kwentas nga diha pa sa liog.

Ang kapolisan mipahigayon dayon og follow-up operation ug nasikop nila ang suspetsado diha sa gibalhinan niining balay sa Lower Mohon.

Matud ni Tarucan nga mitug-an kanila ang suspetsado nga gibunalan niya sa tangkugo og binugha ang biktima tungod kay nagkabikil silang duha ug pagkasunod adlaw na niya kini gilubong.

Sa laing bahin, si Galen nga nahinabi sa Banat News kagahapon nagkanayon nga niadtong Mayo 16, 2011 gisugo niya ang iyang maguwang pagpabayad sa bill sa iyang telepono ug pagkahuman niini og bayad mipauli kini sa ilang balay dayon nananghid sa ilang inahan nga molakaw ug nahibulong na sila nga wala na gyud mobalik.

Gibutyag ni Galen nga iyang maguwang usa ka mahuyang unya polio pa ang walang tiil niini. Gisaysay usab niya nga kanunay’ng ma-bankrupt ang negosyo nga ilang ihatag sa iyang maguwang tungod sa pakigrelasyon niini og mga lalaki.

Si Mandal katabang kaniadto sa karenderya sa biktima nga nahimutang diha sa dalan Sanciangko, dakbayan sa Sugbo apan na-bankrupt ang maong negosyo ni Albert hinungdan nga nagtabang-tabang na lang kini karon sa negosyo sa iyang mga igsuon.

Si Galen nagkanayon nga nagtuo siyang si Mandal ug ang iyang maguwang dugay na nga dunay relasyon.

Ang suspetsado giingong misulti kang Galen nga dihang miduaw ang biktima ngadto kaniya sa building naatol nga nagsipok ang iyang ulo tungod kay nag-away siya ug ang iyang asawa.

Ang biktima giingong nagsige og hinol-hinol kang Mandal hinungdan nga nairita ang suspetsado ug gibunalan niya kini og binugha sa tangkugo.

Apan si Galen natahap nga duna pay laing kauban ang suspetsado sa pagpatay sa iyang igsuon.

Ang Black Berry nga cellphone sa biktima, pitaka nga dunay sulod nga credit card wala na usab ma-recover.

Si Tarucan sa iyang bahin usab, nagkanayon nga ang mga sakop sa PNP Crime Laboratory ug Scene of the Crime Operation (SOCO) na ang miugkat sa patay’ng lawas.

Sa lugar nga nahitaboan gipahigayon ang autopsy diin nasuta nga dunay liki ang bukog sa tangkugo sa biktima nga timailhan nga gibunalan kini og gahi nga butang. Ang suspetsado gikatakdang pasakaan og kasong pagpatay karong Lunes. (EIM) (BANATNEWS)