CEBU, Philippines - Naghilak nga midangop sa buhatan ni Lapulapu City Lone District Congressman Arturo Radaza ang usa ka ginang nga nabiktima sa mangingilad nga migamit sa pangalan sa maong kongresista sulod sa tambalanan sa Perpetual Soccuor Hospital sa milabay’ng adlaw. Ang biktima nga midangop sa buhatan ni Cong. Radaza mao si Bernadita Daculan, 21, residente sa sitio Humayhumay sa dakbayan sa Lapulapu.
Matud pa ni Daculan nga na-admit ang iyang 3-anyos nga anak sa maong tambalanan ug nagproblema kini sa kadako sa bayronon hinungdan nga midangop sa usa ka sibyaanan sa radyo ang iyang bana aron mangayo og tabang sa publiko.
Tuod man, usa ka Mark Garcia ang giingong mikalit og tunga sa tambalanan ug nagpaila ni Daculan nga sakop siya ni Radaza ug siya ang gisugo sa pagtabang sa iyang anak.
Matud pa niini nga si Garcia pa maoy nangulo sa paglihok sa iyang mga papeles ilabi na sa pagdangop sa Social Worker ug sa Department of Social Welfare and Development aron sa paghangyo nga maminusan ang bayranan niini.
Human niini gipangayo ni Garcia ang kwarta ni Daculan balor P10 mil nga igbalayad sa bills ug wala usab siya magduha-duha tungod kay mipasalig si Garcia nga si Radaza nay mopuno sa kuwang ug midiretso kini ngadto sa billing section.
Samtang nagpaabot gibati og kabalaka si Daculan maong iyahang gisusi ang billing section apan nakugang siya nga wala didto si Garcia.
Ang buhatan ni Radaza misusi na sa CCTV Camera sa Perpetual Soccur ug diha nila masayring dili nila sakop si Garcia. Ang kopya sa video nakuha na usab sa kapolisan ug gisusi na karon ang maong mangingilad. (BANATNEWS)