CEBU, Philippines - Nailhan na ang patay’ng lawas sa usa ka dalaga nga unang gipasangil nga ‘mubo og lupad’ nga gilumsan sa tubig baha niadtong Miyerkules sa gabii ug napalgang nasangit sa bato sa barangay Pangdan siyudad sa Naga niadtong Huwebes sa buntag.
Ang biktima giila sa iyang igsuong babaye niadtong Huwebes sa gabii apan ilang gihimakak nga usa kini ka babayeng mubo og lupad subay sa alegasyon sa suspek nga si Alfredo Largo.
Si Chief Insp. Timmar Alam, hepe sa Naga Police Station una nang namahayag nga giangkon ni Largo ang krimen ug iyaha kining gilumsan apan si Chief Insp. Joe Martin Fuentes, medico legal officer sa PNP Crime Laboratory miingon nga intra-abdominal hemorrhage ang namatyan sa biktima ug dili pagkalumos.
Ang igsuon sa biktima nga si Monchelo Caumeran positibong miila sa patay’ng lawas nga mao ang iyang igsuong si Amabel Calinga, 33, taga Barangay Busay, siyudad sa Sugbu.
Hugot usab nga gihimakak ni Caumeran nga ang iyang igsuon usa ka commercial sex worker, matud niini nga dunay tulo ka anak ang iyang igsuon ug pirme kining molakaw ug mosuroy sa higayon nga maguol apan wala siya’y ideya nganong naabot kini sa dakbayan sa Naga.
Si Calinga dunay samad sa walang kilay ug baba nga gikatahong gipatay ni Largo human nahanaw ang P500 sa suspek sa dihang paingon na siyang mag-ilis sa sapot human sa ilang paghilawas daplin sa sapa. Kahinumduman nga si Largo nasikop kini human mailhi sa usa ka habal-habal driver nga maoy mitug-an sa kapolisan nga iyahang pasahero ang maong babaye uban sa suspek nga iyang gihatud diha sa crime scene.
Si Chief Insp. Fuentes miingon nga walay timailhan nga gilumsan ang biktima sanglit walay tubig nga nakita sa baga niini. Ang nakita hinuon mao ang intra-abdominal hemorrhage kon pagdugo sa iyang ginhawaan diha sa ilawom.
“Wala akong findings na drowning kasi walang tubig ‘yung baga. Posibleng binugbog or hit by a hard object,” matud pang Fuentes sa The Freeman igsuong mantalaan sa Banat News.
Siya midugang nga wala siya’y nakitang samad sa kinatawo niini apan duna siya’y nakitang presensya sa ‘seminal fluid’ diin nagpasabot nga nakighilawas ang biktima sa wala pa patya.
Si Alam nagkanayon nga mangayo sila og tabang sa usa ka abogado aron moabag kang Largo ilabi na sa pag-angkon niini sa krimen. (BANATNEWS)