Imported nga karne ug mga manok gisakmit

CEBU, Philippines - Mokabat ngadto sa 85 ka kilo nga dressed chicken ug imported nga karneng baboy ang gisakmit sa Talisay City Veterinarian atol sa gipahigayon nilang operasyon niadtong Huwebes sa hapon diha sa kamerkadohan sa dakbayan sa Talisay.

Kini human ang ilang buhatan nakahipos og mga report nga adunay mga imported nga karneng baboy sa mga merkado sa dakbayan nga gipamaligya apan ang mga meat vendors wala magsunod sa lagda sa city veterinarian.

Sa operasyon sa nahisgutang adlaw, 15 ka kilong mga manok usab diha sa satellite market sa barangay Tanke ang naimbargo ug laing 20 ka kilo usab diha sa satellite market sa Dumlog.

Ang mga naninda sa maong mga manok walay napakitang meat certificate sa mga nag-inspeksyon. Ang meat certificate mao ang pagpamatuod nga luwas, limpyo ug nasusi sa usa ka beterinaryo nga walay sakit ang mananap nga giihaw ug ibaligya sa kamerkaduhan.

Gawas sa mga manok, nasakmit usab sa mga inspektor ang 50 ka kilong imported nga karneng baboy gikan sa mga naninda niini diha sa merkado publiko sa barangay Lagtang.

Ang mga naninda niini wala mosubay sa lagda sa paghupot sa maong imported nga karne sama sa pagbutang kanunay sa maong karne sa freezers. Ang maong mga karneng baboy ilabi na ang imported kinahanglang anaa kanunay sa freezer ubos sa tukmang gibugnawon aron dili kini mahumok ug walay bacteria o kagaw nga makatapot nga makadaot sa panglawas sa tawo.

Apan ang city veterinarian nakadawat og impormasyong dunay mga vendors diha sa merkado publiko sa Talisay ang nagtago-tago og baligya og mga imported nga karneng baboy nga isulod lang og ice box ug humolan lang og ice.

Ang mga imported nga karneng baboy ubos kini og presyo kompara sa lokal nga karneng baboy hinungdan nga daghan ang mopalit niini. (BANATNEWS)