Mga testigos sa Pique kidnap-slay gibutang sa witness protection program

CEBU, Philippines - Gipailawom na sa witness protection program ang tanang saksi batok kang Bella Ruby Santos kinsa usa sa suspetsado sa pagdagit ug pagpatay kang Ellah Joy Pique.

Matud pang Sr. Supt. Patrocinio Comendador, tigpamaba sa Task Force ug hepe sa kapulisan sa probinsya sa Sugbu kini usa nila ka pamaagi aron dili mabutang sa peligro ang mga testigos samtang gihusay ang kaso. Kini agi usab sa paglikay kanila sa mga giingong mga private investigators nga gikuha sa kampo ni Santos nga kamangon sila ug gitanyagan og kwarta aron bakwion ang ilang mga pamahayag.

“Kato pa nang sa una nga gipangkamang kuno among mga witnesses unya hatagan og kwarta,” matud pa niya.

Mipasalig siya nga ang tanang mga saksi anaa sa luwas ug secured nga lugar kinsa nangandam na alang sa umaabot nga  arraignment sa kaso karung Oktubre 24.

Matud niya kun duna nay schedule sa hearing sa kasong kidnapping with homicide, ilaha usab follow-apon ang laing kasong pornography nga ilahang gipasaka batok gihapon kang Santos.

Ang Task Force nakakuha og pipila ka compact disks nga dunay cover sa mga hubo nga hulagway sa mga batang babaye diha sa iyang balay sa Inayagan siyudad sa Naga.

Tungod sa lain nilang kasong gipasaka malaumon ang task force nga malutsan og laing warrant of arrest si Santos karung pipila ka adlaw o buwan gikan karun.

Samtang sa bahin usab sa defense counsel, si Atty. Rameses Villagonzalo mihimakak sa alegasyon sa prosekusyon nga mitunol sila og tunga sa milyon ka pesos ngadto sa usa sa mga witness aron mobali ngadto kanila.

“I challenge CIDG to file case against the bribe offers as they claimed their witnesses were bribed to recant their statements. If they don’t, zero credibility,” matud pa ni Villagonzalo.

Matud pa ni Villagonzalo nga ang mga alegasyon nga gipagawas sa kampo sa Criminal Investigation and Detection Group (CIDG) usa ka “underdog style” kini aron makakuha og simpatiya sa korte ug sa publiko. (BANATNEWS)