Nagselos kapuyo gipatay

CEBU, Philippines - Gipangita karon sa kapolisan ang usa ka giingong ex-convict nga mipusil patay sa iyang kanhi kapuyo tungod sa selos dihang iyang nahibaw-ang nagplano na kining magpakasal sa laing lalaki.

Kini nahitabo atol sa paglabay sa prosisyon diha sa balay sa amahan sa biktima nunot sa kasaulogan sa ilang kapistahan sa barangay Tinaan siyudad sa Naga niadtong Huwebes sa alas 6:00 sa gabii.

Ang biktima nga patay nang nadangat sa tambalanan mao si Rapungel Ceballos, dalaga apan dunay tulo ka mga anak sa kanhi kapuyo ug suspek nga si Willy Ernie Villordon, 51.

Si Villordon giingong tulo ka higayun nang nagsulod gawas sa karsel sa kapulisan sa Naga sa kaso sa illegal drugs ug pagpamusil, wala hinuon maklaro nganong nakagawas ang maong suspek sa bilanggoan.

Matud ni PO1 Ronjie Nadora, desk officer sa Naga City Police dihang nahinabi sa Banat News nga subay sa imbestigasyon, ang suspek miadto kini sa pinuy-anan sa amahan sa biktima ug nagpakiluoy nga sila magbalik sa biktima.

Apan ang pagpakiluoy niini wala hatagi og gibug-aton sa biktima ug hugot na gyud kini sa desisyong buwagan kini.

Matud pa gi-agbayan sa suspek ang biktima diha sa gawas sa pinuy-anan sa amahan sa biktima atol nga miagi ang prosisyon ug kalit niining gipusil ang babaye sa dughan gamit ang wala matinong kalibre sa armas.

Tungod niini naalibwag ang nag-prosisyon ug mikaratel og dagan ang suspek samtang bisan og samaran sa dughan nakahigayun og balik sulod sa balay ang biktima diin kini nahagba. Dali kining gidala sa mga kabanay sa South General Hospital apan gideklarar nga dead on arrival (DOA).

Dugang nahipos nga impormasiyon sa kapulisan nagselos ang suspek tungod kay kaslonon na sa laing lalaki ang biktima. (EIM) (BANATNEWS)