CEBU, Philippines - Gidepensahan ni Vice Mayor Joy Augustos Young ang off-site session nga gipahigayon sa konseho sa dakbayan didto sa barangay Bonbon sa miaging Miyerkules nga gitampunsisokan sa mga opisyal sa barangay ug sa mga molupyo sa ubang kasikbit nga mga barangay sa bukid.
Kini human latigoha og saway ni Mayor Michael Rama ang maong sesyon kay matud pa niya dili angayan sa mga kapitan sa barangay nga modangop diretso sa konseho tungod kay ang mga yangungo niini mag-agad man sa iyang pagtugot .
Miingon si Rama nga naghatag lang kini og kalibog sa katawhan ug bisan sa mga opisyal sa barangay kun asa sila dangop kun may problema sila.
Apan ang tinuod angay masayod ang katawhan nga sa buhatan lang sa mayor sila angayang moduol ug dili kay adto sa konseho.
Matud pa sa mayor nga igo lang sa pagmugna og balaod ang konseho ug wala kini katungod sa paglig-on sa unsa mang proyekto sa barangay.
Apan matud pa ni Young nga dili angayan si Rama nga manginlabot sa mga gimbuhaton sa konseho kay ila kining katungod ang pagpaminaw sa pulso sa katawhan sa kabarangayan ug andam sila sa paghatag sa tanang panginahanglan sa mga molupyo.
Ang off-site sessyion gilusad sa mga konsehal tungod kay gusto nilang adto na modangop ang katawhan sa barangay kanilang mga konsehal ug dili na ngadto sa mayor. (WC) (BANATNEWS)