Wa pasudla kay wala'y excuse letter nalumos

CEBU, Philippines - Gibasol sa amahan sa 9-anyos nga batang lalaking nalumos ang magtutudlo sa iyang anak maoy nakaingon nga kini namatay gumikan sa pagpapauli sa bata tungod kay walay excuse letter.

Ang bata mao si Jason James Vidal, 9, residente sa sitio Sangi barangay Pajo dakbayan sa Lapulapu usa ka grade 4 nga tinun-an sa Mactan Air Base Elementary School (MABES) nalumos sa ilawom sa 2nd Marcelo Fernan Bridge sa dakbayan sa Lapulapu sa milabay’ng Lunes sa buntag.

Si Rolando Vidal (amahan sa bata) atubangan sa kapolisan kagahapon mibasol sa kamatayon sa iyang anak ngadto sa magtutudlo niining si Marilu Solabo.

Matud pa ni Vidal sa milabay’ng Lunes (Oktubre 10) misulod sa klase ang iyang anak apan gipapauli kini ni Solabo kay wala magdala og excuse letter sa iyang pagpalta sa klase sa milabay’ng semana.

Ang bata uban sa laing classmate wala mamauli ug milahos sa ilawom sa Marcelo Fernan Bridge ug nangaligo sa dagat. Ang usa sa mga bata mitug-an nga kusog kaayo ang balod sa dagat dihang miagi ang usa ka fastcraft ug nadala sa bawod si James ug nalumos.

Hinuon si Solabo hugot nga mihimakak sa alegasyon sa amahan ni Vidal ug mipadayag nga sukad pa niadtong petsa 7 ning bulana wala na mosulod sa klase ang bata.

Giangkon ni Solabo nga iyang gipangitaan si Vidal ug excuse letter sa milabay’ng petsa 5 sa bulan sa Oktubre human kini mi-absent niadtong Oktubre 3.

Si Solabo mipakita sa class card sa attendance sa iyang mga tinun-an ug nagpakitang absent ang bata sa Oktubre 7 ug 10 atol sa adlaw sa pagkalumos niini.

Giklaro ni Solabo nga wala gyud motungha sa iyang klase si Vidal niadtong Lunes.

Si Marilou Vallacera, ang prinsipal sa MABES kumbinsido sa pasiunang pamahayag ni Solabo atol sa ilang imbestigasyon ug base sa class attendance record niini.

Si Solabo mipadayag sa iyang kaandam pagtubag sa bisan unsang imbestigasyon nga himuon kalabot sa maong hitabo sanglit di tinuod ang alegasyon sa amahan sa iyang tinun-an.

Hinuon siya mipadayag nga nasubo kini sa gidangatan sa iyang tinun-an. (BANATNEWS)