Babaye 'Gilumsan' sa kostumer

CEBU, Philippines - Patay nang napalgan kagahapon sa buntag diha sa sapa sa sitio Gray Rock, barangay Pangdan, dakbayan sa Naga ang usa ka wala mailhing babayeng gidudahang mubo og lupad nga gituohang gipatay sa iya rang kostumer.

Usa ka 27-anyos nga lalaking minyo ug residente sa barangay Jagimit, Naga ang gitanggong sa kapolisan human siya matultuli sa mga polis subay sa impormasyong gihatag sa habalhabal driver.

Si Chief Inspector Timmar Jamio Alam, hepe sa City of Naga Police Station sa pakighinabi niini sa Banat News kagahapon mibutyag nga ang biktima giila sa suspetsado sa ngalan lang nga “Kim.”

Gibana-banang 30 anyos ang babaye nagsuot og t-shirt nga may “Tweety” sa atubangan apan wala nay karsones ug panty.

Matud ni Alam miangkon ang suspek sa krimen ug mibutyag kini kanila nga nagkita sila ni Kim diha sa Baywalk sa park sa barangay Poblacion niadtong Miyerkules sa gabii diin sila nagkasabot bugti sa P200.

Sumala pa ni Alam natultulan nila ang suspek tungod sa drayber sa habal-habal nga gisakyan sa duha pag-adto sa nahitaboan.

Matud pa ni Alam diha sa pikas tampi sa sapa nagpahuwas sa usa ka lingkuranan nga kahoy ang duha apan human niini naglalis sila tungod kay nawagtang ang P500 nga kwarta sa suspetsado ug ang biktima maoy iyang gipasanginlan.

Gibutyag sa hepe nga ang suspetsado miangkon ngadto kanila nga napatay niini ang biktima tungod sa kapungot ug naglinayogay sila hangtud nga sila nahagbong sa sapa ug diha niya kini gilumsan.

Dugang pa ni Alam human niini gikuot sa suspek ang bulsa sa babaye ug gibawi ang P500 ug giapil og kuha ang iyang gibayad nga P200.

Alas 2:00 sa hapon kagahapon nasikop nila ni Alam diha duol sa ilang balay ang suspek.

Misuway pa unta kini og dagan apan napakgang tungod kay gitawag kini sa kapitan sa barangay nga kauban sa mga polis.

Karong adlawa gikatakda kining pasakaan og kasong homicide diha sa piskaliya sa dakbayan sa Naga.(EIM) (BANATNEWS)