Local meat suppliers naglaom makakuha og dakong pahat sa meat processing

CEBU, Philippines - Malaumon ang mga lokal nga supplier og baboy nga makakuha og dakong pahat sa panginahanglang karne alang sa meat processing industry dinhi sa nasud nunot niining nagkadakong industriya sa processed meat.

Si Roland Tambago, ang presidente sa Central Visayas Pork Production Cooperative (CVPPC) sa pakighinabi sa Banat News mibutyag nga sa pagkakaron gamay pa ang pahat sa local meat suppliers sa industriya sa meat processing dinhi sa nasud ug sa Kabisay-an.

Sa pagkakaron ang mga imported nga karne maoy sagad gigamit sa ubang mga kompanyang nag-proseso og mga karne ug dunay uban nga hiniwa na ang mga karne ug igo nalang ibaligya sa kamerkaduhan ug grocery stores.

Ang lokal hog raisers sa Central Visayas nga nangangkong makahimo pagsuplay sa kinatibuk-ang panginahanglan og karneng baboy sa kamerkaduhan matag adlaw naglaom nga mas molambo pa ang ilang negosyo kun makasulod sila sa meat processing. Si Tambago nagkanayon nga ang kalidad sa lokal nga binuhing baboy sa Pilipinas mas maayo komparar sa mga imported nga karne ilabi na alang sa meat processing.

Ang mga processed meat nga mapalit karon sa kamerkaduhan mao ang mga de-lata, bacon strips, hams, chorizo, skinless, tocino ug uban pa. (BANATNEWS)