Horror booth sa Mandaue subling buksan

CEBU, Philippines - Mga ungo sa ‘horror booth’ sa Mandaue City Sports and Cultural Complex sa sitio Tribunal sa barangay Centro sa dakbayan sa Mandaue maoy nag-unang kalingawan sa kabataan sa pagsaulog sa Adlaw sa mga Kalag karong tuiga.

Ang unang ginang sa dakbayan sa Mandaue nga si Sarah Cortes maoy nagpasiugda sa maong kalingawan nga ang tumong alang sa pagtigom og salapi nga maoy gamiton sa Christmas Party sa mokabat 600 ka mga kabus nga kabataan.

Si Naneth Cortes nga maoy organizer sa maong kalingawan karong tuiga miingon nga ang horror booth karong tuiga ikalima na ka tuig nilang gihimo.

Kini molanat og kapin sa usa ka semana nga diin adunay ipamutang nga mga makahadlok talan-awon nga magsugod karong Oktobre 28 hangtud sa Nobiyembre 2 niining tuiga sa kantidad nga P20 matag tiket.

Naglakip sa mga ungo nga makita sulod sa maong horror booth mao ang manananggal, mga zombie, Dracula, white lady ug black lady ug uban pa.

Si Cortes miingon nga ang matigom nga salapi ilang gamiton sa Christmas Party ug mga pinaskuhan alang sa mga kabus nga kabataan.

Si Violita Cabada nga maoy City Social Welfare Services (CSWS) officer sa Mandaue nga nahinabi sa Banat News miingon ang mga kapitan sa 27 ka barangay sa siyudad maoy mopili sa labing kabus nga kabataan nga nagpanuigon og 12-anyos sa ilang lugar. Kining mga bataa ug lakip na ang mga kabus nga kabataan gikan sa Muslim Community maoy makapahimulos sa gasa gikan sa horror booth. (BANATNEWS)