99% supply sa oil gikan sa gawas

CEBU, Philippines - Sa kadaghan nang   mga oil exploration nga gipahigayon sa mga langyaw nga kompaniya dinhi sa nasud nagpabiling 99 porsento sa supply sa mga produkto sa petrolyo nga gikonsumo sa Pilipinas gikan sa gawas sa nasud busa   maglisud gyud ang kagamhanan sa pagpugong sa pagsaka sa presyo ning maong produkto.

Kini tungod kay hangtod karon daginoton kaayo ang tinubdan   sa asayte nga nadiskobre dinhi sa nasud ug wala makaabot og usa ka porsento   sa katibuk-ang   panginahanglan sa mga motorista ug uban pang industriya , matud pa ni Acting Director Ismael U. Ocampo sa Energy Resources Development Bureau sa Department of Energy (DOE).

Si Ocampo atol sa Kapihan sa PIA kagahapon nga gipahigayon didto sa Abuhan Restaurant mibutyag nga ang   nasud makahabwa lang og   lokal nga produkto sa asayte nga mokabat ra sa 6,500 ka litro matag adlaw , samtang ang katibuk-ang panginahanglan sa asayte dinhi matag adlaw   mokabat sa 300,000 ka litro.

Matud pa ni Ocampo nga ang naghatag ning maong production mao ang oil well didto sa Palawan sa pagkakaron.

Midugang ang maong opisyal sa DOE nga   dinhi sa Visayas may 6 ka mga langyaw’ng kompaniya nga misuway sa pagpangita og tinubdan sa asayte apan hangtod karon, ang sa barangay Libertad, dakbayan sa Bogo ra mao pay malampuson. Ang   nadiskobre didto sa Libertad   mao ang tinubdan sa natural gas nga sarang makapaandar sa makina sa kuryente nga mo-supply og 1.3 megawatts nga elektrisidad alang sa   suga nga gikinahanglan sa tibuok dakyaban sa Bogo.

Matud pa ni Ocampo nga bisan wala pa magsugod og andar ang planta sa kuryente nga sugnoran sa maong gas didto sa Bogo, apan mapasalamaton sila sa mga oil explorer nga milampos sa ilang pagdiskobre ning maong matang rekurso nga gikan mismo sa ilawom sa yuta dinhi sa lalawigan.

Midugang si Ocampo nga   ang mga oil exploration nga gipahigayon sa ilawom sa kadagatan sa Tañon straight, ingon man sa Aloguinsan ug Pinamungajan ug sa kadagatan taliwala sa Sugbo ug sa Bohol padayon pang gisuta sa mga oil explorer kun may klaro bang tinubdan sa asayte ang maong mga lugar.

Hinuon aron makalahutay ang nasud sa pagdawat sa nagkamahal nga mga produkto sa petrolyo gikan sa gawas, padayon ang pagpanapit niini   og mga langyaw nga mga investor aron modiskobre sa mga tinubdan sa matawag nga renewable energy nga langkoban sa mga solar ug wind energy dinhi.

Samtang padayong gipatuman sa kagamhanan ang energy conservation   nga panukdanan nga gipasagop sa mga buhatan sa kagamhanan aron makadaginot ang nasud sa gikinahanglang konsumo sa enerhiya niini matag adlaw.  - BANAT NEWS