Unit 2 sa Carbon di matrabaho

CEBU, Philippines - Gibutyag ni Raquel Arce, hepe sa City Market Authority (CMA) sa dakbayan sa Sugbo nga dili pa kasugdan ang trabaho sa pagpaayo sa karaang edipisyo sa Unit 2 sa merkado sa Carbon   nga gigahinan og P70 milyones.

Matud pa ni Arce nga dili makaigo ang maong budget  tungod kay mokabat man sa P300 milyones   ang maggasto sa, maong proyekto.

Miingon si Arce nga mohangyo sila sa konseho sa siyudad sa Sugbo   nga dugangan   ang   maong budget.

Nagkanayon ang hepe sa CMA nga kun sugdan ang trabaho  nga kuwang    sa budget, dili kini magkadimao kay maputol    ang trabaho ug wala nay klaro kun kanus-a kini mahuman.

Kini tungod kay ang pag-estokada sa   budget nga himoon sa konseho molanat og tinuig una maaprobahi busa   dili makahatag   og kaayohan ning dakbayan. 

Giklaro niya nga mas maayo nga unya na sugdi ang trabaho kun kompleto na ang budget aron nga deretso ang trabaho niini ug dali nga mahuman ug mahikay usab dayon ang permanenteng puwesto sa mga  vendor.

Hinuon ang siyudad sa Sugbo mihimo usab karon og pamaagi nga mapun-an ang maong budget   pinaagi sa pag pangayo nila og tabang   gikan sa nasudnong kagamhanan.

Nasayran nga ang maong proyekto maoy usa sa gihangyo ni Mayor Michael Rama sa dihang mibisita si Presidente Noynoy Aquino dinhi sa Sugbo sa milabay’ng tuig.  - BANAT NEWS