Rerouting ipatuman sa pista sa Talisay

CEBU, Philippines - Ang City of Talisay-Traffic Operations and Development Authority (CT-TODA) mipahibawo sa publiko sa pag-usab sa rota sa mga sakyanan lakip na ang mga tak-opang kadalanan sa bisperas ug adlaw sa pista sa patrona sa siyudad nga si Santa Teresa de Avila karong Oktubre 14 ug 15, 2011.

Si Gerard Lariego, hepe sa traffic management sa Talisay sa pakighinabi sa Banat News kagahapon nagkanayon nga ang rota sa prosisyon gikan sa simbahan sa Santa Teresa de Avila sa barangay Poblacion modimano paingon sa Vicente Garces street dayon mopaingon ngadto sa barangay Dumlog, modesilya sa likod sa barangay hall, dayon modesilya gihapon ngadto sa Burgos street sa likod sa Talisay City Central School, moliko gihapon sa wala balik sa Vicente Garces street unya balik sa simbahan sa Poblacion.

Ang eskina sa Cebu South Coastal Road (CSCR) habig sa barangay San Isidro paingon ngadto sa barangay Dumlog tak-opan sa alas 4:00 sa hapon inig ka Oktubre 14, 2011   apan ablihan kini sa alas 7:00 sa gabii human sa prosisyon.

Apan bisan og ablihan na ang maong karsada ipatuman gihapon ang rerouting scheme.

Matud niya nga atol sa prosisyon ang mga sakyanan nga maggikan sa barangay Cansojong nga moadto sa Dumlog modimano kini ngadto sa Cabalan street sa barangay Poblacion dayon lahos ngadto sa Carmen Village depende kung moliko ba kini sa wala ngadto sa CSCR sa barangay San Isidro.

Human sa prosisyon, ang mga sakyanan nga maggikan sa dakbayan sa Sugbo nga mopaingon ngadto sa barangay Cansojong nga moagi sa CSCR palikoon kini sa wala paingon sa sitio Uldog unya dimano sa may Carmen Village Street sa barangay Poblacion lahos sa P. del Rosario street sa Poblacion gihapon dayon modimano   unya modesilya na usab sa Lopez Jaena street dayon gawas sa Vicente Garces street.

Ang gikan sa barangay Cansojong nga moadto sa Dumlog moliko kini sa tuo dapit sa Cabalan street sa barangay Poblacion ug depende sa sakyanan kung molahos ba kini ngadto sa Carmen Village street o moliko ba kini sa wala balik sa P. del Rosario street.

Ang karsada atubangan ug kilid sa simbahan sa barangay Poblacion atol sa bisperas ug adlaw sa pista wala nay pasudlong mga sakyanan.

Ang gikan sa dakbayan sa Sugbo nga mopaingon sa Poblacion moliko sa wala sa General Luna street dayon liko sa tuo sa Lopez Jaena street dayon paingon sa Vicente Garces street sa barangay Cansojong.

Ang gikan sa barangay Cansojong nga mopaingon sa Poblacion moliko kini sa tuo diha sa Cabalan street depende niini kung moagi ba kini sa Carmen Village. Sa adlaw sa pista ang nahisgutang rerouting scheme ipatuman gihapon apan ang usa ka lane sa karsada sa Mohon-Pooc road padung sa San Isidro CSCR sa alas 12:00 sa udto sirad-an.   - BANAT NEWS