Sunog wa kahuygo

CEBU, Philippines - Gumikan sa pagtinabangay sa mga managsilingan, wala makahuygo ang sunog nga miigo sa usa ka balay didto sa sitio Kiosko sa barangay Basak-Pardo ning siyudad   sa miaging buntag.

Ang nasunog mao ang usa ka boarding house nga gipanag-iya sa usa ka Josie Navarro.

Subay sa pasiunang imbestigasyon sa kabomberohan   nasayran nga ang ikaduhang andana sa balay ni Navarro giabangan nila ni Rosemarie Cecilio, Reynante Basilio ug usa ka   Maricris   nga may   kapuyo

Si SFO3 Jimmy Layao, imbestigador sa BFP nga nahinabi sa mga tigbalita nagkanayon nga ang ‘kalan’ nga didto sa kuwarto ni Maricris nga posibling gibiyaan ug nakalimtan pagpawong uban sa iyang kapuyo sa wala pa sila manlakaw paingon sa ilang trabaho maoy sinugdanan sa kayo. Dihang misugod na og ulbo ang kayo nabantayan kini ni Cecilio nga nag-abang usab sa pikas kuwarto.

Dihang misinggit si Cecilio og sunog dali kaayong milihok ang mga silingan ug nag-iyahay og kuha og tubig pinaagi sa balde, planggana, gallon ug uban pa nga maoy gisabwag ngadto sa kayo hinungdan nga wala kini makahuygo.

Si Kapitan Dave Tumulak sa maong barangay midayeg sa kaabtik nga gihimo sa iyang mga sakop sa kaalisto niini nga misulbad sa maong    dako untang katalagman.  - BANAT NEWS