Mama giligid og tigbas angol

CEBU, Philippines - Kritikal ang kahimtang sa usa ka inahan human kini tigbasa sa iyang silingan   didto sa Sitio Kalubihan barangay Abucayan sa lungsod sa Balamban niadtong Lunes sa alas 6:30 sa buntag.

Ang biktima mao si Ma. Rowena Delarmente, 40, minyo, nga taga Kalubihan, samtang ang   suspek mao ang iyang silingan nga si Gerry Ycot, 37, minyo.

Si PO2 Cesar Climaco, desk officer sa Balamban Police Station mibutyag sa Banat News nga ang biktima naghatod sa iyang duha ka anak ngadto sa Abucayan Elementary School.

Apan pag-abot niini sa usa ka awaaw nga lugar kalit lang mitumaw ang suspetsado   ug giligid siya og tigbas busa samdan ang aping, buko-buko ug nagkadaiyang bahin sa iyang lawas hangtud nga natumba siya ug nakuyapan.

Nasalbar ang kinabuhi sa biktima dihang mikaratil og dagan ang suspetsado sa kahadlok nga may tawong nagdanga-danga paingon sa nahimutangan sa pagpamanhig.

Ikaduha ang siyagit sa duha ka bata nga nakasaksi sa maong hitabo usa usab sa   naghatag og dugang kahadlok sa biktima   busa wala niini tiwasa og patay   ang biktima kinsa   nakuyapan na niadtong higayona.

Gihatod   dayon ang biktima ngadto   sa Balamban district hospital apan gi-transfer kini dayon ngadto sa Vicente Sotto Memorial Medical Center (VSMMC) tungod sa katalandugon sa kahimtang niini.

Ang suspek didto motahan sa iyang kaugalingon sa mga opisyal sa barangay ug human kini  ika-turnover ngadto sa kapolisan gipaslak dayon kini sa karsel samtang nagpaabot kini sa kiha nga   iyang atubangon.

Ang motibo sa maong kremin giingong naggumikan sa mga tsismis nga mugna sa biktima.  - BANAT NEWS