Landslide mitabon sa karsada

CEBU, Philippines - Napuno sa midahili nga yuta kagahapon sa hapon ang karsada sa barangay Kalunasan hinungdan nga motorsiklo nalay makaagi niini.

Sumala ni barangay konsehal Oliver Boyet Ocampo nga naggumikan kini sa kusog nga uwan niadtong Biyernes nga nakapahumok sa yuta apan kagahapon lang mahunlak ngadto sa karsada.

Hinuon   matud pa ni Ocampo nga walay mga balay nga natam-ukan sa yuta ug wala usay kinabuhi nga naangol ug nakalas.

Nangayo usab sila og hinabang   sa mga sakop sa Cebu City Risk Reduction Management Council aron makapadala dayon og mga kahimanan sa paghinlo sa karsada nga natabunan sa yuta kay wala nay mga dagkong sakyanan nga makaagi niini.

Samtang nahasol usab ang mga motorista didto sa   highway sa Barangay Kinasang-an gumikan kay taga tuhod   ang giladmon sa tubig nga napundo sa maong lugar human sa kusog nga uwan niadtong Biyernes.

Sumala pa ni Kapitan Susan Enriquez nga naglaraw sila nga palapdan nila ang kanal sa maong lugar aron adto makabuhagay ang tubig sa uwan.

Hinuon masalbar kini tungod kay may gigahin nang pundo si Mayor Michael Rama alang sa drainage system ning dakbayan matud pa ni Enriquez. (BANATNEWS)