CEBU, Philippines - Napahak ang ulo sa duha ka tawo dihang gipanigbas kini sa ilang silingan sa sitio Fatima sa barangay Labogon, dakbayan sa Mandaue sa miaging gabii.
Ang mga biktima mao sila si Jose Willy Guido, 36, ug Pepito Pajardo, 27, pulos minyo, samtang ang suspetsado mao si Edeniano Mandaue, 31, nga ilang silingan, pulos sa Labogon.
Si SPO3 Renato Valle sa Presinto 3 sa Mandaue City Police Office (MCPO) nga nahinabi sa Banat News miingon nga nag-inom sa yarda sa mga sakyanan nga ilang gitrabahoan sa maong dapit ang duha ka biktima uban sa suspetsado.
Unya dihang nangalasbag na nahisgutan nila ang pagkulata sa suspetsado ngadto sa duha sa miaging mga buwan nga maoy sinugdanan sa ilang lalis nga misangko sa sinumbagay ni Pajardo ug Mandaue.
Apan miuwang si Guido hinungdan nga misamot ang kapungot ni Mandaue hangtod nga mikuha kini og sundang sa ilang balay ug gitagsatagsa paghabas ang duha ka biktima.
Ang duha usab nga way praktis bahin sa self defense, pulos natigbasan ug nangapahak ang bagol-bagol niini. Pag-abot sa mga tanod sa barangay misibat dayon ang suspetsado ug mipalayo gikan sa maong dapit.
Gidala dayon sa tambalanan ang mga biktima samtang ang suspek gipangita pa sa kapolisan. (BANATNEWS)