CEBU, Philippines - Natabas ang bukton sa usa ka tawo dihang gidunggab kini sa gikailog niya sa microphone sulod sa videokehan sa barangay Bangbang, lungsod sa Cordova sa miaging gabii. Ang biktima mao si Joseph Marturillas, 37, minyo, samtang ang suspek mao si Betillano Jumao-as, 44 , minyo usab nga pulos taga Bangbang.
Si SPO1 Danny Alburo sa kapolisan sa maong lungsod nga nahinabi sa Banat News miingon nga sayo pa sa hapon nga nag-inom ang duha ka managsilingan sa sulod sa videokehan sa maong lugar ug nagkalingaw kini og kinantahay.
Apan dihang nangalasbag na nag-inilogay kini sa mikropono kay nagpasikatay kinsay maayong laki nilang mokanta nga misangpot sa ilang sinumbagay.
Ang biktima nga nasakitan sa kumo sa suspek, migawas kay mopauli apan gisundan kini sa suspek ug giluba. Maayo nalang kay praktisado ang biktima, nasagang ang kutsilyo apan natabas gyud ang iyang bukton.
Nadakpan ang suspetsado ug nagkagulkol na kini sa prisohan. (BANATNEWS)