Naaktuhang nanglungkab gipaslak sa prisohan

CEBU, Philippines - Duha ka mga batan-ong giingong manglungkabay og balay ang naaktuhan sa nagpatrolyang mga polis samtang sila nanghakot sa mga butang nga ilang kinawat gikan sa gilungkab nilang panimalay sa barangay Tayud sa lungsod sa Liloan kagahapon sa alas 3:00 sa kaadlawon.

Ang mga nadakpan mao sila si Wilmas Ensinan, 19, taga barangay Kalunasan ning dakbayan sa Sugbo ug Agustin Cosido Ibon, 24, taga Greenvillage, barangay Guadalupe sa samang dakbayan.

Samtang ang nanag-iya sa gilungkab nilang panimalay mao si Joseph Quiapo Pilapil, 34, nagpuyo sa maong lugar.

Matod ni PO2 Armando Mahinay sa Liloan Police ug usa sa mga arresting officer nga samtang nagpatrolya sila nasigpatan nila ang duha sa sala sa pinuy-anan sa biktima nga ma-klaro sa gawas sa ilang gibuhat.

Ang nakapahibulong sa mga polis kay bisan diha sa sulod nga makita diha sa bildo nga bintana pulos sila nagsuot og helmet maong nagduda ang mga polis hinungdan nga ilaha silang gipanid-an.

Dihang gihakot na sa mga suspek ang mga butang paingon sa gawas ilaha dayun kining gisikop ug didto na recover ang LCD flatscreen, CPU, Nike shoes kolor itom ug usa ka Nokia cellphone.

Apil sa nakuha sa kapulisan ang usa ka Suzuki nga motorsiklong itom ang kolor nga dunay plaka nga 7466-IQ nga maoy gigamit sa mga kawatan ug duha ka kutsilyo.

Nasuta nga ang mga anak ug katabang lang ang nahabilin sa panimalay niadtong tungura nga wala makabantay sa pagsulod sa mga kawatan. (BANATNEWS)