Kapitolyo nakadawat og pasidungog gikan sa DOH ug UP

CEBU, Philippines - Gawas sa upat ka mga district hospital sa probinsiya sa Sugbo nga nakadawat og pasidungog, nadugangan ang nadawat nga pasidungog ang kagamhanan ning lalawigan sa Sugbo gikan sa Department of Health ug sa National Institute of Health sa University of the Philippines Manila.

 Kini tungod sa paghatag og ayuda sa Kapitolyo ngadto sa mga district hospital aron makabaton kini og mga kahimanan alang sa bag-ong matawo   nga mahimugsong   mga bata aron masayran dayon ug matambalan samtang bata pa kini.

Sumala pa ni Integrated Provincial Health Officer, Dr. Cristina Giango nga ilang nadawat ang maong pasidungog atol sa gipahigayon nga National Awarding for New Born Screening Facility Achiever and Exemplary Performance didto sa Manila dili pa dugay.

Gitug-an ni Dr. Giango nga ang lalawigan sa Sugbo maoy usa sa 6 ka mga local government unit   sa tibuok nasud nga mahatagan sa maong award tungod sa siyento porsiyentong paghatag og suporta niini alang sa pagpatuman sa new born screening program sa Department of Health. (BANATNEWS)