Luigi miduso sa HB 5385

CEBU, Philippines - Nagtinguha si Representante Gabriel Luis R. Quisumbing sa 6th District of Cebu nga kahatagan og compensation ang mga biktima sa baha nga mugna sa mga dam o reservoir nga mabuswang sa tibuok nasud.

Kini ang unod sa giduso niyang House Bill 5385 nga giulohan og “An act providing compensation to people adversely affected by the release of water from dams or reservoirs, creating for the purpose of the National Dam Safety and Review Board (NDSRB) and appropriating funds therefore”.

Matud pa ni Quisumbing nga ang nahisgutang balaodnon nagtinguha usab sa pagpatuman og hugot nga pagmonitor sa tanang mga dam sa nasud pinaagi sa pagtukod og NDSRB.

“Alang kang Quisumbing nga gituyo niya kini pag-umol aron nga kun mahimong balaod may madawat ang mga tagtungod sa tawo nga makabsan sa kinabuhi bunga sa pagkalumos sa tubig nga gikan sa dam.

Ang   matudlong modumala sa NDSRB maoy momugna og sistema aron motakda sa kantidad nga angayang dawaton niadtong mabiktima sa baha o lunop   gikan sa reservoir o dam.

Ang maong ahensya mao usab ang mosil-ing kanunay sa kahimtang sa dam, motan-aw sa mga kakulangan niini ug sa laktod maoy responsable kun maguba kini ug ang tubig nga mobuhagay mobanlas sa kapatagan nga moangin og kinabuhi sa katawhan, kahayopan ug mga tanom.

Alang kang Quisumbing nga ang nahitabo nga lunop ug mga baha didto sa Luzon bunga sa gipangablihan nga mga dam nga nakabiktima og kinabuhi ug kabtangan wala kaayo’y makapanubag sa   mga biktima tungod kay walay ahensya nga gitahasan sa pag-abalo   sa kadaot nga nahiagoman nila.(WC)  (BANATNEWS)