Rama may bahad

CEBU, Philippines - Mibahad si Mayor Michael Rama kagahapon   nga dili niya itugyan ang Guba Hospital ngadto sa Vicente Sotto Memorial Medical Center (VSMMC).

Si Rama mitakda og usa ka panagtagbo tali sa mga opisyal sa   Department of Health (DOH) karong sunod adlaw aron klarohon ang maong isyu.

Kasamtangang gidumala sa Cebu City Medical Center (CCMC) ang maong tambalanan sa Guba ug gisaysay sa mayor nga ang maong tambalanan gisaaran niyang palambuon   atol sa iyang State of the City Address.

Sumala pa sa mayor nga dako kaayo og natabang ang Guba Hospital sa mga residente sa mga bukirang barangay busa kinahanglang magpabilin kini ubos sa pagdumala sa siyudad.

Kahinumdoman nga miuyon si Kongresista Rachel del Mar sa sugyot nga itugyan na lang sa VSMMC ang pagdumala sa Guba Hospital.

Kini   tungod kay alang kang del Mar dili makatubag   sa panginahanglan sa tambalanan sama sa   mga tambal ug uban pa ang pundo nga gigahin sa siyudad   alang sa maong tambalanan.

Nasayran nga ang Guba maoy sentro sa amihanang bahin sa mga bukirang barangay sa siyudad diin nahimutang kini sa gilay-ong 24 kilometros gikan sa patag nga bahin sa dakbayan sa Sugbo.

Ang maong tambalanan modawat sa mga pasyente gikan sa 15 ka mga silingang barangay niini.(WC) (BANATNEWS)