Babaye mireklamong gilugos sa 'paryente'

CEBU, Philippines - Usa ka ginang ang misang-at og kasong two counts of rape ug kalapasan sa Republic Act 9262 for Violation Against Women human siya makadaghan pahimusli ug nabuntis sa iyang giila nga kaliwat. Si Marie (dili tinuod ngalan) usa ka minyo ug molupyo sa Naga ang misang-at og kaso batok kang Giovanni Mata, molupyo sa V. Rama Avenue ning dakbayan.

Sa complaint –affidavit ni Marie, gisaysay niini nga tuig 2008 dihang iyang nahimamat si Mata sa Naga kansang apelyedo pareho sa iyang apohan ug sukad niadto nag-isipay na silang managparyente.

Hangtod nga nianang buwan sa Disyembre sa susamang tuig giimbitar siya sa suspek aron manan-aw og live band sa Fuente Osmeña alas 8 sa gabii diin giingong gipainom siya niini. Hangtud nga nalipong siya sa kahubog ug gipugos siya pagpasakay niini og taksi ug gidala sa usa ka hotel bisan og iyaha kining gihangyong ihatud siya sa ilang balay.

Diha sa hotel gilugos siya niini ug wala pa gyud matagbaw ang suspek giusban siya paglugos niini makadaghang higayon diha na sa ilang balay sa Naga kung wala diha ang iyang inahan.

Sa matag pagpanglugos hulgaon siya sa suspek nga may dautang mahitabo kaniya ug sa iyang inahan kung mosumbong sa mga awtoridad. Hangtud nga niining buwan sa Abril nahibaw-an nalang niyang namabdos siya ug nagduda siyang tungod kini sa pagpanglugos sa suspek. Nakadesider siya sa pagsumbong sa suspek dihang subli silang nagkita sa suspek diha sa usa ka mall sa Talisay ug gibunlot ug gituok siya niini.

“From the uncontroverted allegations of the complaint, undersigned finds basis to recommend to the Honorable Provincial Prosecutor the indictments of the respondent for 2 counts of rape,” tipik sa resolusyon. (BANATNEWS)