Polis nga nagpasalba sa armas gisikop

CEBU, Philippines - Nagtingkagol karun sa karsel sa Fuente Police Station ang usa ka polis human kini nagpasalba sa iyang armas sa barangay Sambag 2 ning dakbayan pasado alas-9 kagahapon sa buntag. Si PO3 Edwardo Seno, 37, nga nadestino sa Police Regional Office (PRO-7) sa buhatan sa Regional Headquarters Support Group gisikop human ireklamo.

Sa pakighinabi sa Banat News sa hepe sa kapolisan sa Fuente Police nga si Sr. Insp. Stanley Sabang, mibutyag kini nga ang tanod sa barangay Sambag 2 maoy mipahibalo kanila nga nagpasalba sa iyang armas ang maong polis.

Hinungdan nga ilang giadto sa maong lugar apan gibitbit na kini sa Mobile Patrol Group ug gihatod sa ilang buhatan.

Matud pa ni Sabang nga nanimaho sa ilimnong makahubog si Seno hinungdan nga gipaubos kini sa liquor test.

Midugang si Sabang nga base sa ilang nakuha nga impormasyon, nagkalalis si Seno ug ang iyang kapuyo.

Gipangita pa usab sa kapolisan kung asa na ang armas sa maong polis. (BANATNEWS)