Bayot nga nangmolestiya gikiha

CEBU, Philippines - Usa ka bayot nga mimolestya og tulo ka menor de edad gipasakaan og kaso sa korte human kini mapakyas sa pagsumiter sa iyang tubag ngadto sa piskaliya sa kasong gisang-at batok kaniya.

Si Elmer Heronjo alyas Yads, nga taga barangay Balirong syudad sa Naga nag-atubang og 3 counts of acts of lasciviousness base sa balaod nga gilagda sa Republic Act 7610 o ang Child Abuse diin girekomendar nga papiyansahon kini og P240 mil.

Sa resolution nga giluwatan ni Naga City Prosecutor Napoleon Alburo, mibutyag kini nga nagpadala siya og subpoena ni Heronjo nga nag-awhag niini sa paghandos og counter affidavit isip tubag sa kasong gisang-at sa tulo ka menor de edad nga nagpangidaron og 17-anyos, ug duha ka 14-anyos batok kaniya.

Apan si Heronjo, wala moduso sa iyang tubag hinungdan nga nakadesider si Alburo nga iduso ang maong kaso ngadto na sa korte human usab makita niya nga   aduna kini lig-ong basehanan.

Ang 14-anyos nga biktima mibutyag nga niadtong Abril 15 ning tuiga ala 1:00 sa hapon didto sa sitio Panas barangay Balirong nagkalingaw siya og tan-aw og salidang Batman sulod sa panimalay ni Heronjo.

Apan sa kalit lang gihinol ni Heronjo ang iyang batiis ug gipalatay ang kamot niini ngadto sa iyang tiyan lahos na ngadto sa sulod sa iyang short nga nakapakurat kaniya.

Ang 17-anyos nga laing biktima ni Heronjo, mibutyag usab nga niadtong Hunyo 30 ning tuiga alas 2:00 sa hapon si Heronjo mihangyo kaniya uban sa iyang ig-agaw nga moadto sa umahan aron mangabuno sa kamaisan niini. Apan human sila mangabuno namahuway sila unya gisugo ni Heronjo ang 17 anyos nga ig-agaw niini sa pagpalit og sigarilyo. Dihang sila nalang duha si Heronjo, ang maong batan-on midugang nga samtang didto ang akusado sa sulod sa usa ka kamalig sa maong umahan, gitawag siya niini ug gisugo nga ipatangtang ug ipatarong ang iyang bra.

Unya didto kalit lang gipanghinol ni Heronjo ang mga pribadong parti sa iyang lawas ug gipasidan-an siya nga dili siya pasabaon sa mahitabo nila tungod kay dili siya gusto nga ma-bad record.

Samtang ang laing 14-anyos nga biktima usab, mibutyag nga nahitabo ang pagmolestya kaniya niadtong Hunyo 3 ning tuiga alas 4:00 sa hapon sulod gihapon sa payag. (BANATNEWS)