P150 mil funds para bRGY sa Talisay wa suportahi

CEBU, Philippines -  Gi-deferred sa konseho sa dakbayan sa Talisay ang resolusyon nga nagsugyot sa paghatag og P150,000 nga pundo matag tulo ka buwan sa matag barangay sa siyudad.

Ang Talisay gilangkuban kini sa 22 ka mga barangay ug si Konsehal Val Ylanan kinsa maoy nangamahan sa nahisgutang resolusyon nagkanayon nga ang maong pundo ipuno sa mga budget sa matag barangay alang sa ilang mga kalihukan nga ipahigayon sama sa mga kalihukan sa sports o paugnat sa kusog sa mga batan-on.

Gawas niini aron usab dunay magamit ang mga barangay alang sa outings ug mga meetings sa mga senior citizens, ug disabled, barangay services sama sa medical mission, libreng mga tambal ug feeding alang sa kabataan.

Gikataho nga ang budget office giingong walay mahatag nga budget alang sa maong katuyoan hinungdan nga ang maong sugyot gi-deferred una.

Si Ylanan gibati og kasagmuyo sa gidangatan sa iyang resolusyon ug natahap kini nga dili kabahin sa budget ang hinungdan niini.

Si Ylanan kinsa sakop sa minoriya sa konseho sa siyudad nagkanayon nga pila lang ka resolusyon nga iduso sa iyang grupo ang aprobahan o uyonan sa konseho.

Si Ylanan mipasabot nga alang sa kaayohan sa katawhan ang iyang tumong sa pagpasar niya sa resolusyon.

Matud usab niya nga ang maong ideya nakuha niya gikan sa dakbayan sa Naga nga adunay 28 ka barangay ug naghatagan og P100,000 kada tulo ka buwan sa matag barangay.

Si Ylanan nagkanayon nga kung nahimo kini sa dakbayan sa Naga posibleng mahimo usab kini sa dakbayan sa Talisay nga gikatahong sobra sa P400 milyones ang abot niining tuiga. (EIM) (BANATNEWS)