CEBU, Philippines - Duha ka mga lalaki ang napalgang pulos wala nay kinabuhi sa duha ka managlahing lugar sa dakbayan sa Sugbu sulod sa usa ka oras kagahapon sa kaadlawon.
Unang napalgan ang patay’ng lawas ni Rodulfo Rama, 55, residente sa Figueroa St. barangay San Nicolas ning dakbayan diha sa sala sa panimalay nga gibantayan.
Si Teria Lopedo nga silingan ni Rama mitug-an sa kapolisan nga nahibulong wala na mogawas-gawas si Rama hinungdan nga ilaha kining gisusi sa laing silingan nga si Wilfredo Cabilar.
Dihang ilang gisusi mao nalay ilang nakit-an ang nagbuy-od nga patay’ng lawas sa biktima. Wala hinuoy nakit-ang timailhang may foul play sa kamatayon niini.
Paglabay sa usa ka oras laing patay’ng lawas ang napalgan diha sa fruit stand sa Osmeña Blvd. sa barangay Sambag II. Giila sa kapolisan ang peanut vendor nga namatay mao si Glenn Bravo alyas Tagalog, 38.
Nakit-an nalang kining nagbuy-od sa fruit stand sa sidewalk ug patay na, wala hinuoy nakit-ang senyales ang kapolisan nga gipasipad-an kini og laing tawo.
Nasuta usab nga nag-inusarang nag-inom og bino si Bravo nianang pagkagabii ug pagkahuman natulog sa iyang pwesto. (BANATNEWS)