Kenyan basahan sa kaso bisag wa iyang abogado

CEBU, Philippines - Moabot man o sa dili ang abogadong ipadala sa gobiyerno sa Kenya basahan sa iyang kiha karong adlawa diha sa palasyo sa hustisya ang Kenyan national nga gipasanginlang nagdala og tulo ka kilong shabu sa Mactan Cebu International Airport.

Kini ang pamahayag ni Lapulapu City RTC Executive Judge Toribio Quiwag atol sa napakyas nga arraignment sa milabay’ng adlaw sud sa iyang sala.

Sa milabay’ng Miyerkules Oct. 5 wala mahinayon ang arraignment ni Asha Ogutu ang Kenyan national nga nakuhaan og tulo ka kilong shabu sa MCIA sa milabay’ng Sept. 29, 2011.

Sumala pa wala dawata ni Ogutu ang serbisyo sa Public Attorneys Office nga mao untay morepresentar kaniya tungod kay adunay abogadong ipadala ang ilang embahada alang kaniya.

Apan wala kini moabot niadtong Miyerkules maong gioktaba ang pagsang-at sa kaso may labot sa kalapasan sa RA 9165 ubos sa Sec. 11 sa Art. II.

Si Quiwag mipasabot ngadto ni Ogutu nga pwede siyang hatagan og abogado sa korte atol lamang sa maong arraignment, apan wala mosugot ang Kenyan national hinungdan nga gisibog kini karong adlawa.

Matud pa ni Quiwag bisan pa og wala kini abogado ipadayon niya ang arraignment sa kaso ni Ogutu ug kung wala kini abogado hatagan kini og abogado sa korte alang sa maong arraignment.

Samtang migawas nga kompirmadong shabu ang nakuhang tulo ka kilo puting pulbos kang Ogutu sumala pa ni Jigger Montallana bag-ong regional director sa Philippine Drug Enforcement Agency (PDEA) Central Visayas.

Matud pa niya nga kini base sa resulta sa confirmatory test human sa gihimong eksaminasyon sa PDEA ug National Bureau of Investigation. Ang mga ahente sa NBI nakadawat og report gikan sa ilahang ulohang buhatan kabahin ni Ogutu sakay sa Qatar Airways flight QR656 gikan sa Doha, Qatar.

Si Ogutu sa sayo pa mipadayag nga siya inosente sa pasangil kay matud pa niya nga hinatag ra kaniya ang bag diin makuha ang maong shabu.

Matud ni Montallana nga tungod sa maong resulta mosamot na unya kalig-on ang kasong gipasaka sa NBI ngadto sa piskaliya sa dakbayan sa Lapulapu batok sa maong Kenyan national.

Dugang ni Montallana nga ilahang gipahugtan ug sa uban pang law enforcement agencies sa pag-monitor sa pagpalusot sa maong tugpahanan og ilegal nga drugas aron sa hinay-hinay ila kining mapuhag.(EIM) (BANATNEWS)