CEBU, Philippines - Ang Cebu Federation of Beat Journalists (CFBJ) miawhag sa Visayas Ombudsman nga imbestigahon ang kanhi direktor sa Philippine Drugs Enforcement Agency (PDEA)-7 nga si Adrian Alvariño tungod sa giingong pagpangharas niini sa usa ka tigbalita ug kalapasan sa kagawasan sa prensa kon “freedom of the press.”
Inabagan sa nagkadaiyang presidente sa nagkalain-laing beats dinhi sa Cebu Press gisang-at ang reklamo diha kang Deputy Ombudsman for the Visayas Virginia Palanca-Santiago kagahapon. Ang maong awhag mitumaw dihang si Alvariño giingong nasuko sa migawas nga balita batok kaniya.
Subay niini ang mga sakop sa police beat reporters ang nakadawat og mensahe sa text nga nagkanayon “maayong adlaw…,naa unta koy i-tip nga naay nadakpan sa PDEA ginganlan og Yongyong Villaceran sa riverside zapatera miyerkules sa gabi. Ilang gibuhian kay nakabayad og P800,000 gipabalon ni Alvariño. Palihug ko og follow up kay nalipay unta mi nga nadakpan si yongyong pero gibuhian lang. Walo ka bulto sa shabu ang nakuha, palihug intawn pakganga ni ang ilang binuang. Maglaum mi nga makatabang mo ani. Kana si george cansancio, tecson o paca og uban pa diha”.
Ang maong mensahe gituohan sa mga tigbalita nga usa ka news worthy hinungdan nga niadtong Septiyembre 23, 2011 miadto ang mga reporter sa buhatan sa PDEA aron kuhaan og pamahayag si Alvariño kabahin niini apan giingong mibalibad kini sa paghatag og pamahayag.
Si Alvariño sa kinaulahian (human mapagya sa media) miingon nga dili na siya direktor ug narelibohan na siya atol sa maong adlaw sa operasyon ug wala na siyay kontrol sa PDEA-7.
Dihang na-broadcast sa telebisyon ug radio ug dinhi sa Banat News ang maong balita niadtong Septiyembre 24, 2011 giingong gikasuko kini ni Alvariño.
Dihang gitawgan sa tigbalitang si Rey Pasaporte isip responsableng tigbalita aron kini kuhaan og pamahayag giingong nasuko kini ug gibaharan ang maong reporter nga sa iyang pagsabot daw gihulga ang iyang kinabuhi.
Tungod niini nagpa-blotter sa City Intelligence Branch (CIB) sa Cebu City Police Office si Pasaporte.
Ang maong insidente giisip sa CFBJ nga usa ka harassment ug pagpanghulga sa kinabuhi ug propesyon sa usa ka journalist.
Kagahapon ang mga opisyal sa CFBJ ug mga miyembro sa DEPP nagpanon ngadto sa buhatan sa Ombudsman-Visayas ug giduso ang affidavit ni Pasaporte kabahin sa hulga.
Gawas ngadto sa Ombudsman-Visayas ang DEPP mipadangat usab og kopya sa ilang position letter ngadto sa buhatan ni Chief Superintendent Marcelo Garbo, Director sa Police Regional Office (PRO)-7, Senior Superintendent Louie Oppus, Deputy Director for Operation (PRO)-7, Director Jigger Montallana sa PDEA-7, Director General Jose Gutierez, PDEA National Office, Director Zoilo Lachica, Chief Investigation and Intelligence Service, PDEA National Office, Senador Gregorio Honasan ug Senador Tito Sotto. (BANATNEWS)