CEBU, Philippines - Nagtingkagol sa prisohan ang usa ka tawo human hidakpi sa kapolisan nga nagdala og duha ka bugkos nga pinaugang dahon sa marijuana sa usa ka checkpoint sa dalan national sa barangay Poblacion sa lungsod sa Liloan sa miaging udto.
Ang suspetsado mao si Dave Rosales dela Cruz, 29, minyo nga taga barangay Umapad, dakbayan sa Mandaue.
Si PO2 Ernesto Pepito sa kapolisan sa nahisgotang lungsod miingon nga sayo niini nakadawat sila og taho kalabot sa wala hiilhing lalaki nga nagsakay og mini bus gikan sa dakbayan sa Danao nga nagdala og mga armas.
Kini ang hinungdan nga mipahigayon dayon sila og checkpoint sa maong lugar ug kutob sa mga pasaheroang sakyanan nga moagi ilang gipara ug gi-inspection ang mga pasahero ug ang mga kargamento niini.
Dugang pa ni PO2 Pepito nga ilang nadakpan ang suspetsado dihang usa kini sa mga pasahero nga ilang gipakanaug apan ilang nasigpatan nga may gidala kining duha ka bugkos nga butang nga giputos og newspaper nga gidali sa pagbutang sa luyo nga bahin sa mini bus nga iyang giluwanan.
Matud pa ni PO2 Pepito nga dihang ilang gisusi ang maong mga putos, ilang nasuta nga pulos kini mga pinaugang dahon sa marijuana.
Dihadiha gidala nila kini sa ilang buhatan ug gibalhog sa prisohan samtang gihikay na ang tukmang kaso nga isang-at batok kaniya.
Hinuon gipanghimakak ni Dela Cruz ang pasangil nga iyang kargamento ang maong mga pinaugang dahon sa marijuana. (BANAT NEWS)