Rama gipasakaa'g laing kaso

CEBU, Philippines - Gawas sa kasong indirect contempt of court nga gipasaka ni Lucina Rallos, atubangon na usab ni Mayor Michael Rama   ang kasong may labot sa paglapas sa RA 6713   nga   gisang-at gihapon sa maong kihante   ngadto sa buhatan   sa Ombudsman Visayas.

Si Lucina Rallos, hingkod nga taga Upper Tabok syudad sa Mandaue ug usa sa mga manununod sa katigayonan ni Rev. Fr. Vicente Rallos maoy kihante   nga misang-at sa kaso nga paglapas sa Code of Conduct and Ethical Standards for Public Officials and Employees batok ni Rama.

Matud pa ni Rallos nga ang maong kaso naukay human sila magpadala og sulat   kang Rama niadtong Hulyo 21, 2010 nga    nadawat sa buhatan sa mayor nianang pagka-Hulyo 23 sa maong tuig.

Apan giingong napakyas si Rama sa pag-reply sa maong suwat nga gipadala ug busa nakalapas kini    sa balaod bahin sa Code of Conduct and Ethical Standards for Public Officials and Employees, sumala pa ni Rallos.

“The undersigned respectfully requesting the Office of the Ombudsman to conduct whatever proceedings is required by law, procedure, rules, and regulations and hold the Mayor of Cebu City administratively and criminally liable,” tipik sa complaint affidavit ni Rallos.

Midugang si Rallos nga ang pagpasaka nila og reklamong kalapasan sa anti-corrupt practices act ila na usab nga  giandam    nga dugang kaso nga ilang ipasaka batok sa mayor.

Sa sulat nga gipadala ni Rallos ngadto kang Rama base sa judgment sa Court of Appeals (CA) “Lucina Rallos, et. Al. vs. Honorable Geraldine Faith Econg, et. Al.” and CA, mimando   kini sa kagamhanan sa dakbayan sa Sugbo sa pagpabayad ngadto kanila sa obligasyon niini sa yuta sa mga Rallos nga gigamit sa kagamhanan isip right of way. (WC)(BANAT NEWS)