Arsobispo misalig sa magbabalaod

CEBU, Philippines - Gisalig na ni Arsobispo Jose Palma sa Sugbo ngadto sa mga magbabalaod sa nasud ang pag-usab sa Republic Act 9344 o ang Juvenile Justice and Welfare Act of 2006.

Una nang gipadayag ni Palma ang iyang suporta sa pag-usab sa maong balaod tungod kay nakita niya nga makatarunganon ang awhag sa nagkadaiyang sektor bahin sa pagpaubos sa edad gikan sa 15-anyos sa mga batan-on nga mahimong mabilanggo kun makahimo og krimen.

Hinuon, sa iyang pamahayag atol sa selebrasyon sa World Teacher’s Day didto sa DepED ECOTECH Compound sa sitio Sudlon, sa barangay Lahug, ning dakbayan sa Sugbo, si Palma miklaro nga kutob ra ang simbahan sa pagsuporta, apan  magpaabot   nalang sila kun unsay sangputanan ning lakang sa pag-amendar   sa kontrobersiyal nga balaod.

“The church is in favor with this plan because we see many young people today becoming delinquent but we leave it to the competence of the legislators regarding this move,” matud pa ni Palma. Nagsukad ang mga plano sa pag-usab sa   mga lagda sa Juvenile Law human mosulbong ang nagkadaiyang linuog nga krimen sa nasud nga naglambigit sa mga kabatan-onan. Niadtong miaging buwan, usa ka 16-anyos nga bayong-bayong dinhi sa Sugbo ang gipasanginlang mipatay sa linuog nga paagi sa iyang kaugalingong inahan nga nagsabak og pito ka buwan ug ang anak babaye niini   nga 5-anyos.

Ang labing bag-o usab nga   krimen nga nahitabo didto sa kaulohan mao ang pagpamusil sa 13-anyos nga lalaki sa higala niyang 16-anyos sulod sa usa ka Mall. (BANAT NEWS)