Nangapasong masuso sa CCMC paeskuylahon

CEBU, Philippines -  Pormal nang nagpinirmahay og kasabutan kagahapon ang kagamhanan sa siyudad sa Sugbo ug ang mga ginikanan sa duha ka mga bata nga nangapaso sa Cebu City Medical Center nga nahitabo sa unang bahin karong tuiga.

Ang walo na ka buwan karong bata nga si Kean Carl Villarico ug ang pito ka buwan nga masuso nga si Vincent Gonzaga makabaton og libreng edukasyon sa ilang pagtungha niini hangtud na sa kolehiyo ug pag-atiman sa ilang panglawas.

Kahinumduman nga ang maong mga bata naapektohan sa mibuto nga gooseneck lamps niadtong Pebrero 20 sa Cebu City Medical Center.

Gihatagan usab og trabaho ni Mayor Michael Rama sa City Hall ang mga ginikanan sa maong bata.

Ang inahan ni Kean nga si Michelle misaysay sa Banat News nga wala gyud sila pasagdi sa kagamhanan apan wala pa hingpit mawala ang trauma diha kanila sa nahitabo sa ilang anak. - (BANAT NEWS)