Noval di daw 'fair' sa Compostela, direktor mihimakak

CEBU, Philippines -  Ang buhatan sa bise-gobernadora Agnes Magpale nakadawat og mga negatibong report kalabot sa pagdumala ni Department of Interior and Local Government (DILG) Director Pedro Noval isip OIC-Mayor sa lungsod sa Compostela.

“Dunay mga accusations gikan sa taga-Compoåstela nga dili siya (Noval) fair,” matud pa ni Magpale sa pakighinabi sa Banat News kaniya sa telepono.

Miangkon si Magpale nga wala pa hinuon niya kini (mga negatibong report) mapamatud-i apan mipadayag kining iyang gikalipay ang taho nga hulipan na si Noval isip OIC-Mayor sa Compostela. Mibutyag usab si Magpale nga ang labing maayong solusyon aron masulbad ang problema sa lungsod sa Compostela mao ang pagpalingkod sa nakadaug nga opisyales bisan sa nagpadayong protesta.

Si Noval sa iyang bahin sa dihang nahinabi sa telepono sa Banat News nakapangutana og kun asa siya dapita nahimong ‘unfair’. “I treated everybody there equally.”

Matud pa ni Noval wala siya’y gidapigang tawo sa Compostela ug siya mipasabot nga igo ra usab siyang mituman sa mando kaniya sa iyang mga labaw pagserbisyo sa katawhan sa Compostela isip OIC ug wala niya pangayoa ang maong posisyon. “Maski pang-gasolina lang gani ang DILG pay naggasto,” pasabot pa ni Noval.

“Serbisyo ning amo. Sakripisyo ning amoa. I am spending my own money, even a single centavo wala koy madawat diha (Compostela). In what way nga unfair ko? Follow lang ko what is provided by law,” pasabot pa ni Noval.

Dihang gipangutana sa Banat News kung aduna bay bulok politika ang nanggawas nga ‘negatibong report’ si Noval sa gipadalang text dinhi sa Banat News miingon “maybe.”

Si Noval giingong ibalhin sa Tacloban apan kini mibutyag nga wala pa siya makadawat og order gikan sa ilang labaw. - (BANAT NEWS)