Kenyan nga nakuhaa'g 3 kilong shabu gitanggong na

CEBU, Philippines -  Nakuyapan ang babayeng Kenyan sulod sa palasyo sa hustisya sa dakbayan sa Lapulapu atol sa pormal nga pagpasaka og kasong drug trafficking ug gimanduan nga mabilanggo sa Lapulapu City Jail.

Matud pa ni National Bureau of Investigation Senior Agent Arnel Pura sa milabay’ng adlaw pormal na nilang napasaka ngadto sa piskaliya sa dakbayan sa Lapulapu ang kasong kalapasan sa RA 9165 batok ni Asha Apiano Oguto.

Samtang kini gibasahan sa iyang kaso giingong nakuyapan kini maong gitabang sa mga tawo.

Matud pa ni Pura base sa ilang nakuhang impormasyon sakop si Oguto sa West African Drug Syndicate isip tigdala sa ilegal nga drugas kon drug mule.

Dugang ni Pura nga una kining higayon nga misuway ang maong sindikato pagpalusot dinhi sa Sugbu.

Si Lapulapu City RTC Executive Judge Toribio Quiwag miluwat dayon og “commitment order” kang Oguto nga kini bilangguon sa Lapulapu City Jail.

Matud pa ni Pura nga karong adlawa posibleng moabot ang abogado ni Oguto gikan sa nasud sa Kenya aron modepensa kaniya sa maong kaso.

Si Oguto gisikop sa hiniusang operasyon sa NBI, Philippine Drug Enforcement Agency ug Bureau of Customs sud sa MCIA human makuhai og tulo ka kilong shabu.

Ang suspek hugtanong mihimakak sa maong krimen sanglit matud pa niya hinatag ra kaniya ang maong traveling bag. (BANAT NEWS)