CEBU, Philippines - Gitun-an sa buhatan ni Mayor Michael Rama ang mga nakitang apan sa pagpadagan sa mga pangpublikong tunghaan dinhi sa dakbayan.
Ang mayor kinsa kanunay na nga magbisitahan sa mga tunghaan nagkanayon nga lahi na kaayo ang iyang nakita kumparar sa kaniadtong mga tunghaan sa karaang panahon.
Lakip sa mga nakit-ang salawayon nga buhat mao nga adunay mga tunghaan adunay mga tawong nagpuyo, adunay mga ginikanang makasulod sa tunghaan bisan panahon sa tingklase.
Nakita usab sa mayor ang kakulang sa mga pansayan nga matud pa niya dili na presentableng tan-awon.
“Sa pagsige nako og suroy sa mga eskwelahan, ako nabantayan nga duna na may nausab karon ikumpara sa karaang panahon. Dunay kausa nga nakakita lang ko nga dunay hinayhay sulod sa eskwelahan,” matud pa sa mayor.
Nagdumili hinuon ang mayor pag-ila kung unsa nga mga tunghaan ang iyang nakitang adunay namuyo.
Gikatakdang makigkita si Rama sa City Schools Division aron matuki ang pagpangita og solusyon kalabot niini. (BANAT NEWS)