CEBU, Philippines - Patay ang usa ka amang nga bungol nga 50-anyos nga lalaki human madasmagi og trak de karga sa iyang pagtabok sa karsada sa highway sa barangay Malhiao sa lungsod sa Badian niadtong Lunes sa alas 3:00 sa hapon.
Ang biktima mao si Vidal Cagang nga nagpuyo sa nahisgutang lugar samtang ang nakadasmag kaniya mao ang trak de kargang puno sa karga nga semento ug sin nga gimaneho ni Renante Macion, 35, taga Poblacion-1 lungsod sa Malabuyoc.
Matud ni PO3 Danilo Teopis, desk officer sa Badian Police Station dihang nahinabi sa Banat News subay sa imbestigasyon bag-ohay pang nangompra ang maong trak sa dakbayan sa Sugbo paingon nang mopauli sa lungsod sa Malabuyoc.
Pag-abot sa maong lugar nagsirbato nang daan ang trak tungod kay dunay usa ka tigulang nga naglakaw daplin sa dalan apan pag-abot sa unahan kalit lang milabang ang biktima nga way lingilingi hinungdan sa pagkapunggit niini sa trak.
Miangkon ang drayber sa kapolisan nga naapiki na kini pag-brake maong nadasmagan gyud niini ang biktima kinsa nalukot-lukot ug nalamba taliwa sa karsada.
Daling gihatud sa Badian District Hospital ang biktima apan gideklarar kini sa mga doktor nga dead on arrival (DOA). Boluntaryong mitahan ang drayber sa kapolisan. (BANAT NEWS)