Mama misukol sa rapist gipatay

CEBU, Philippines -  Usa ka 20-anyos nga inahan ang gipusil-patay atubangan sa iyang anak niadtong Lunes sa ala-9 pasado sa buntag sulod sa ilang pinuy-anan sa bukirang lugar sa barangay Adlaon siyudad sa Sugbu.

Ang biktima giila sa kapulisan nga mao si Mary Grace Rabina, 20, dunay kapuyo ug dunay duha ka mga anak ug kamagulangan nagpangidaron og 3-anyos nga babaye ug ang ikaduha lalaki nga nagpangidaron usa ka tuig ug pito ka buwan.

Gidudahang buot untang luguson ang biktima apan misukol sa suspek maong kini gipusil ug base usab sa nakitang mga bun-og sa iyang duha ka mga bukton ug black-eye sa walang mata.

Usa ka William Magno, 37, minyo ug dunay upat ka mga anak maoy gitumbok sa saksi nga maoy responsable sa krimen kinsa nadakpan sa hot pursuit operation sa mga sakop sa Cebu City Public Safety Company nga gipangulohan ni SPO1 Judito Llena. Si PO3 Ruth Violango sa Homicide Section sa Cebu City Police Office (CCPO) nagkanayon nga may samad pinusilan sa luyong bahin sa iyang ulo ug milapos ang bala sa walang bahin sa nawong ang biktima.

Wala gisalikway sa mga imbestigador ang posibilidad nga lugoson unta kini apan kay misukol. Walay nakuhang basiyo sa bala diha sa crime scene ug gituohan nga revolver ang gigamit sa suspetsado.

Ang suspek kusganong mihimakak sa krimen apan giingong mitug-an kining may giuli siyang armas.

Duha ka mga testigo ang mibutyag nga ilahang nakit-an ang suspek nga naglakaw padulhog sa sapa apan wala kini motangas.

Ug samtang sila nanguha og buwak nakadungog sila og sipang buto ug sunod nilang nakit-an ang suspek nga miambak gikan sa balay sa biktima nga nagtaptap sa nawong niini.

Dihang ilang gisusi ang balay sa biktima nakita nila ang kinamanghurang anak sa biktima naghilak ug nagsige’g sampit og ‘mama’ ibabaw sa patay’ng lawas sa inahan niini.

Ang kapuyo sa biktima nga si Ryan Inocando wala diha sa pagkahitabo kay mitambong kini sa una niyang adlaw sa trabaho sa konstruksyon.

Matud ni PO3 Violango nga ilahang narekober ang usa ka .38 revolver nga gituohang gigamit sa maong krimen, jacket nga itom ug shorts nga nagkadugo gikan sa panimay sa suspek.

Matud ni Violango nga ilaha na karung giandan ang kasong murder batok sa suspek kinsa anaa karun gitanggong sa detention cell sa CCPO samtang ilaha nang gihikay usab ang mga affidavit sa mga saksi sa maong kremin. (BANAT NEWS)