CEBU, Philippines - Nalandig sa tambalanan ang usa ka gwardya nga napusilan human giingong nakigpinusilay sa usa ka pulis nga mitubag alarma sa dihang nangayog panabang ang mga kabanay sa hinigugma sa maong gwardiya.
Nahitabo kini alas-11 sa miaging gabii diha sa Purok 4 sa barangay Camputhaw siyudad sa Sugbu.
Si Jerry Tinae, 33, sakop sa Unisave Security Agency ug nagpuyo sa sitio Pura sa barangay Apas nakamaneho pa sa iyang motorsiklo paingon sa Perpetual Soccour Hospital aron magpatambal tungod sa duha ka samad pinusilan sa tiyan ug tuong bahin sa iyang kamot.
Ang pulis nga nakapusil giila sa Homicide Section sa Cebu City Police Office (CCPO) mao si PO2 Eric Ricardel sakop sa San Nicolas Police Station.
Subay sa pasiunang imbestigasyon sa kapulisan sila si Danny Gonzaga, 38, Julie Pugoy, 45, ug Devine Pugoy, 22, nagpuyo sa maong lugar maoy nangayo og panabang kang Ricardel kinsa duty niadtong higayona sa San Nicolas Police Station.
Sumala pa nga nagmaoy tungod sa kahubog si Tinae gikan nag-inom uban sa iyang hinigugma ug pagkataud-taod mipagawas sa iyang .38 revolver. Si Ricardel miabot apan dihang iyang giestoryahan si Tinae wala kini mopatuo ug nakigpinusilay kaniya hinungdan nga nakapabuto siya sa iyang service firearm nga kalibre .45 ngadto ni Tinae. Anaa na sa mga imbestigador ang mga armas sa duha. (Rey B. Pasaporte/EIM)
Wa nay Mandaue PUJ nga makasulod sa Cebu City
Istrikto nang ipatuman sa siyudad sa Sugbo ang pagdili pagsulod sa mga PUJ nga nagbiyahean og Mandaue sa siyudad sa Sugbo, kini gipahibalo pipila ka adlaw human gidid-an sa Mandaue ang mga garbage trucks sa dakbayan sa Sugbu nga makaagi sa ilang lugar kun molabay og basura sa Consolacion dumpsite.
Kini maoy gibutyag sa executive director sa City Traffic Operation and Management (CITOM) nga si Atty. Rafael Yap kagahapon sa mga media nga ilaha nang dakpon kadtong PUJ nga mosulod sa Urdaneta St. dapit sa Metropolitan Cathedral.
Sumala pa ni Yap nga igo ra nila nga gituman ang City Ordinance 1837 busa dili sila angayan basulon sa mga drayber. Gisugdan kaniadto ang dili pagpasulod sa mga PUJ gikan sa Mandaue ngadto sa Jones Avenue.
Nasayran nga nakadawat og daghang reklamo ang buhatan sa CITOM nga gihimo na og terminal sa mga drayber ang maong dapit nga miresulta sa problema sa trapiko.
Sumala pa ni Yap nga sukad gidid-an ang 21B ug 22B sa Jones naharuhay na ang dagan sa trapiko sa downtown area ug karon buot nilang sulbaron ang problema diha sa Urdaneta Street nga rota sa 22D, 22A , 21A, 21G ug 21D.
Samtang si Mayor Michael Rama miklaro nga dili kini panimalos ngadto sa mga opisyales sa dakbayan sa Mandaue kay igo ra usab sila miimplimentar sa ordinansa sa siyudad. (BANATNEWS)