CEBU, Philippines - Usa ka lola nga gidudahang natagak gikan sa taytayan diha sa Pasil ang napalgang patay ug naglutaw sa kadagatan sa sitio Mahayahay 2 sa barangay Pasil siyudad sa Sugbu kagahapon sa alas-5:20 sa buntag.
Giila sa kapulisan ang tiguwang nga mao si Elizabeth Boguia, 57, taga sitio Lawis Riverside sa barangay Pasil human nakit-an sa usa sa mga pasahero sa pumpboat nga naglutaw sa dagat.
Subay sa imbestigasyon sa Homicide Section sa Cebu City Police Office (CCPO) giingong magbisitahan sa iyang anak nga kargador diha sa Pasil Fish Port si Boguia.
Matud ni Elmer, 33, laing anak ni Boguia, nga nawala ang ilang inahan niadto pang miaging adlaw ug ilang gituohang mibisita kini sa usa niya ka igsuon diha sa Pasil.
Nagduda silang nahulog kini sa usa sa mga gagmay’ng taytayan sa Pasil human giataki sa sakit niini sa kasingkasing.
Ang kapulisan mitataw nga walay samad sa kalawasan ang biktima nga magpakitang dunay mipasipa kaniya nga laing tawo. (EIM) (BANAT)