Kawaning maaksidente tabangan

CEBU, Philippines - Giduso ni Konsehal Emmarie Lollipop Ouano Dizon ang usa ka ordinansa nga maghatag og pinansiyal nga hinabang sa mga kawani sa kagamhanan sa maong dakbayan nga maaksidente atol sa pagtuman sa ilang kaakohan sa trabaho.

Si Konsehal Ouano Dizon mipasabot nga nakita niya ang maong mga panginahanglan dihang usa sa mga kawani sa kagamhanan nadasmagan og PUJ samtang diha kini sa trabaho sa reclamation area sa miaging bulan niining tuiga.

Matud pa niya nga nag-supervise ang nahisgotang kawani sa mga kawani nga nanghinlo sa kadalanan sa maong lugar dihang kalit lamang kining nadasmagan sa naghaguros nga P UJ nga maoy hinungdan sa pagkaangol niini.

Dugang pa sa maong konsehal nga mihangyo unta og tabang ang mga kabanay sa maong kawani apan gibalibaran kini ni Mayor Jonas Cortes dihang ang legal officer sa kagamhanan sa maong dakbayan mideklarar nga walay kabasehan nga ordinansa nga nagtugot sa paghatag og pinansiyal nga hinabang sa maaksidente nga mga kawani.

Gitataw ni Ouano-Dizon nga iyang nakita ang dakong panginahanglan sa salapi sa kabanay sa maong kawani kinsa nag-alagad na    sulod sa 23 na ka tuig nga gidugayon sa dakbayan. Si Ouano-Dizon sa iyang gihan-ay nga ordinansahon mipasabot nga ang mga regular, casual ug mga job order nga mga kawani kinahanglang kahatagan og pinansiyal nga hinabang sa kagamhanan sa panahon nga maaksidente kini sa iyang trabaho kun kaaprobahan na ang gipasaka niyang ordinansa. (Romeo T. Limpangog/WC)   (BANAT)