Dalagita napusilan angol

CEBU, Philippines - Kritikal ang kahimtang sa usa ka 17 anyos nga dalagita human kini pusila sa kaaway sa iyang maguwang didto sa ilang pinuy-anan sa barangay South Poblacion sa lungsod sa San Fernando niadtong Domingo sa gabii.

Ang biktima mao si Gyle Clores, 17, dalaga, nga taga San Fernando,1st year College sa usa sa mga unibersidad dinhi sa dakbayan sa Sugbo, samtang ang suspek mao si Alexander Neil Velez Enad, 27, minyo, nga silingan ra sa biktima.

Si PO1 Janel Figura sa San Fernando Police nga nahinabi sa Banat News nagkanayon nga ang biktima mao pay paggawas sa ilang gate kay molakaw dihang gipusil kini makaduha ka higayon sa suspek kinsa naghupo nang daan sa gawas.

Ang biktima naigo sa iyang tiyan ug walang paa   ug dihang nahagba kini sa yuta misirit usab dayon og dagan pahilayo sa maong lugar ang suspetsado.

Nagduda ang kapolisan nga ang biktima maoy gipanimaslan sa suspek tungod kay giingong ang maguwang lalaki sa biktima kansang ngalan wala makuha   nagkakontra ug ang suspek.

Sa pag-respondi sa mga polis nasikop niini si Jade Baclayon, ang drayber sa habal habal nga maoy gisakyan sa suspek ngadto sa balay sa biktima.

Si Baclayon kinsa nagtingkagol na sa prisohan miangkon nga igo lang siyang naghatod sa suspetsado ngadto sa palibot sa balay sa biktima apan wala siya masayud kun unsay tuyo niini. Sa pagkakaron padayon pang gipangita sa kapolisan ang suspetsado, samtang ang biktima anaa pa sa tambalanan.(Darrel A. Carumba/WC) (BANAT)