Tawo gilapsan sa bala

CEBU, Philippines - Gilapsan sa bala sa armas ang lawas sa usa ka tawo nga nag-angkas sa motorsiklo dihang gipusil kini  sa duha ka wala hiilhing lalaki didto   sa barangay Dunggoan sa dakbayan sa Danao sa miaging kaadlawon.

Ang biktima nga naangol mao si Risalino Enriquez Calzada, 33, minyo nga taga Dancar sa barangay Dunggoan.

Matud pa ni SPO2 Ildefonso Prosia sa kapolisan sa dakbayan sa Danao nga ang biktima nagsakay og habalhabal nga gimaneho ni Benjamin Roble.

Nasayran usab nga gawas sa biktima angkas usab sa maong   habal-habal si Jude Ipil nga taga Dunggoan usab kinsa maoy nataliwad-an sa drayber ug sa biktima.

Matud pa ni SPO2 Prosia nga gikan pa sa trabaho ang biktima ug nagpaingon na kining mopauli sa ilang balay busa misakay kini og habal-habal.

Unya samtang nagdagan ang motorsiklo nga giluwanan niini kalit nga mi-overtake ang laing motorsiklo nga giluwanan sa duha ka wala hiilhing kriminal.

Dihang nagkatapad na kini ug ang gisakyan sa biktima, kalit kining gipusil.

Matud pa ni SPO2 Prosia nga nasabak ang biktima sa walang bahin sa lawas ug milapos kini  sa pikas.

Si SPO2 Prosia miingon nga nagpadayon pa karon ang ilang imbistigasyon sa pag-ila sa mga suspetsado ug ingon man ang pagsuta sa hinungdan sa maong pagpamusil.  - BANAT NEWS