Bukas kotse ug kawat sa motor misiaw sa Mandaue

CEBU, Philippines - Dili lang ‘bukas kotse’ gang ang naghasi karon sa dakbayan sa Mandaue kon dili lakip sa daghang mga insidente mao ang pagpangawat og mga motorsiklo diha sa mga parkingan.

Niadtong miaging adlaw laing biktima sa pagpangawat og motorsiklo si Aliano Potot, 47, taga Malibu Beach sa Wireless sa barangay Subangdaku.

Ang motorsiklo sa biktima nga kolor pula ug kombinasyon sa kolor puti nga pintal ug nagdala sa plate number nga IMC 6727 iyang gibilin diha sa kilid sa usa ka gasoline station sa dalan A. Del Rosario sa barangay Centro kay aduna kini gipalit sa convenience store sa maong gasolinahan.

Apan sa iyang pagbalik wala na ang iyang motorsiklo. Ang kapolisan nagdudang posibleng pangahuyon ang mga kinawat nga motorsiklo ug ipamaligya sa pisa-pisa.

Samtang wala usab isalikway ang posibilidad nga gamiton kini sa paghimo og krimen.

Sa laing bahin, si Inspector Ramil Morpos, deputy chief sa Investigation and Detective Management Branch sa Mandaue City Police Office mibutyag nga nailhan na nila ang suspek sa ‘bukas kotse’ gang.

Apan dihang ilang giadto sa panimalay niini sa sitio Pinahagbong sa barangay Mabolo sa dakbayan sa Sugbo nakalayat kini sa bintana. Ang suspek maoy gitumbok nga responsable sa paglungkab sa awto sa magtiayong Amerkano sa dalan A.S. Fortuna sa barangay Banilad, dakbayan sa Mandaue.  - BANAT NEWS