Milugos sa 13-anyos nadakpan

CEBU, Philippines - Nagtingkagol sa karsel sa Talisay City Police Station ang usa ka 22-anyos nga lalaki kinsa suspetsado sa pagpanglugos sa usa ka menor de edad nga babaye human kini masikop ni PO3 Arnold Damasco uban sa mga sakop sa Talisay City Intelligence Bureau (TCIB) kagahapon sa buntag diha sa sitio Nonoc, barangay Tabunok, sa nahisgutang siyudad.

Ang suspetsado mao si Ruben Alisoso, dunay kapuyo ug residente sa barangay Camp 4 sa nahisgutang siyudad.

Dala ni Damasco ang warrant of arrest sa kasong pagpanglugos kalambigitan sa kalapasan sa Akta Republika 7610 kon “Child Abuse” nga giluwatan ni Regional Trial Court (RTC) Judge Olegario Sarmiento sa Branch 24 batok kang Alisoso.

Si Damasco nga nahinabi sa Banat News kagahapon mibutyag nga nahitabo ang krimen niadtong tuig 2008 diha sa usa sa mga barangay sa Talisay.

Matud usab niya nga niadtong higayona ang biktima nagpanuigon pa lang kini og 13-anyos dihang gilugos sa suspetsado diha sa sulod sa usa ka tunghaan.

Human sa pagpanglugos si Alisoso misibat kini ug nagtago-tago apan niining ulahi lang nakadawat sila og report nga mibalik sa Talisay ang suspetsado.

Ang korte wala mohatag og pagtugot kang Alisoso nga makabutang og piyansa alang sa temporaryo niyang kagawasan.  - BANAT NEWS